Sanctuary – Nora Roberts

Sanctuary is ‘n heelwat ouer boek wat besonder baie herinner aan haar nuutste, The search. Die storie speel ook af op ‘n idilliese eiland daar iewers naby Florida en ‘n baie creepy stalker is ook daar bedrywig. Dis baie interessant om te sien hoeveel sy die tema in die nuutste boek uitgebrei het. Maar ek hou meer van die ouer boek – waarskynlik omdat die karakters nog ‘n ietsie meer romanties voorgestel word, hoewel hul geensins volmaak is nie. In haar nuutste boeke wil-wil die helde soms aan abusive begin grens, die heldinne is regtig soms so hardekwas dat ‘n mens moeilik kan glo hulle kan so vroulik en sexy tussen die lakens wees!
Die skrywer doen groot moeite om in die obsessiewe moordenaar se kop te klim en sy optrede te motiveer. Hier word dit veral gedoen met fotografie as die tema van sy vaardigheid, sy liefde en sy obsessie daarmee om die volmaakte oomblik op film vas te lê.
Die hoofkarakters word so duidelik geteken dat ‘n mens werklik met hulle kan identifiseer. Sy is ‘n sterk vrou wat haarself te ver gedryf het en gedwing word om skuiling te gaan soek by die enigste veilige hawe wat vir haar oor is – haar disfunksionele familie. Ongelukkig is die sanctuary toe nie so veilig nie … Hy kom terug na die eiland om te probeer verstaan – en te besluit of hy sy verskriklike geheim moet uitlaat. En natuurlik ontmoet hulle twee daar, soos toe hulle kinders was. En stry steeds oor wie nou eintlik destyds vir wie in die rivier gestamp het …
Daar is eintlik drie liefdesverhale inmekaar gestrengel. Aldrie is baie geloofwaardig en al die karakters word pragtig en oortuigend geteken. Maar ai, die seks raak nogal oorweldigend as die leser by drie paartjies se kaperjolle moet probeer byhou!
Die fotografie tema word deurgaans uitstekend gebruik en die besonderhede het nie vir my te veel geword, soos soms in haar boeke gebeur nie.
Die roerendste van die storie was egter vir my die pad van die gesin na herstel. Die rusies, die stadige bewus word van die band wat hulle in werklikheid bind, die sukkelende kommunikasie, die humor, die gedeelde herinneringe, en eindelik die punt waar broer en suster, pa en kind, vir mekaar kan sê: Ek is lief vir jou.
As jy van Roberts se boeke hou – laat waai! Jy sal nie teleurgesteld wees nie.

Advertisements